عاجل | تدشين أول كنيسة باسم أبونا ميخائيل إبراهيم بيد الأنبا مكسيموس 🙏

❤️لحظة مميزة جدًا وفرحة كبيرة… تم تدشين أول كنيسة باسم القديس القمص ميخائيل إبراهيم، في كنيسته بـ«كنيسة السيدة العذراء مريم الأثرية بكفر عبده» ببنها، على يد الأنبا مكسيموس، وكمان تم تدشين أيقونات أبونا ميخائيل وسط فرحة كبيرة من كل الحضور

👏 الأجمل بقى إن الحدث ده جه بعد يوم واحد بس من إعلان المجمع المقدس لقداسته

أبونا ميخائيل إبراهيم كان كاهن كنيسة مارمرقس شبرا، اتولد سنة 1899 وانتقل للسماء سنة 1975، وكان أب حقيقي وخادم أمين أثر في حياة ناس كتير جدًا… من أساقفة ورهبان وكهنة وخدام.

❤️كان إنسان بسيط جدًا من بره، لكن جواه حب وفرح وسلام كبير… قدر يلمس قلوب ناس كتير بمحبة حقيقية وتواضع نادر

📌 من حياته:

اتولد يوم 20 أبريل 1899، واتربى في حضن الكنيسة بكفر عبده، وبعدها كمل تعليمه ودخل مدرسة الأقباط الكبرى.

اشتغل فترة في وزارة الداخلية واتنقل في أماكن كتير، لحد ما ربنا دعاه للكهنوت سنة 1951.

📌 في خدمته:

كان مختلف… لغى فكرة التبرعات بالشكل التقليدي وخلى العطاء في الخفاء، وكمان لغى رسوم الخدمات، فحبّه الناس جدًا وقربوا منه.

وبعد سنة واحدة بس، اتسمّى قمص سنة 1952.

📌 مواقف من حياته:

– علّم الكهنة درس مهم: ما تثقش في نفسك مهما كبرت، وساعد اللي يقع يقوم.

– كان طيب وحنين جدًا… لدرجة إنه اعتذر لطفل لأنه علي صوته عليه.

– كان دايمًا يشجع الناس ويخفف عنهم بتواضعه ومحبة قلبه.

📌 نياحته:

انتقل للسماء يوم 26 مارس 1975، وصلى عليه البابا شنوده الثالث، وسط حضور كبير جدًا من الشعب.

✨ قصة حياته ببساطة بتقول:

الحياة مع ربنا مش بالكلام… لكن بالمحبة والبساطة والقلب النضيف ❤️

🙏 صلواته تكون معانا كلنا آمين

✍ صفحة مقالات أبونا أغناطيوس الأنبا بيشوي